LU VULIRI DI LU CASTEDDU DI PETRAPIRZIA (Palori a lu ventu) di Gino Ragusa Di Romano (Dialettali)

Appujatu a 'na puntara antica
'ncapu un cozzu dormi un casteddu,
la festa oramai cci la fa l'ardica,
pirchì nun havi vrachi nni cappeddu.
La so storia la ficiru ddi genti,
chi sudura nni jittaru tanti e tanti,
chi pri manteniri li patruna cuntenti
tanti voti la so panza era vacanti.
Di stu casteddu appartinutu a latruna
s'hannu fattu tanti studii e ricerchi
pri sapiri cui furu ddi nobbiluna,
chi 'n facci si meritavanu li merchi.
Tuttu si fici pirchì ddi strunza,
furu sì strunza, ma di merda blu;
genti chi si 'inchì sacchetti e panza
sfruttannu puvireddi e servitù.
Lu casteddu, pri tant'anni abbannunatu,
chi havi quattru mura e nenti cchiù,
taliannu ddi alluccuti allittirati,
s'arrigorda nni ddi longhi nuttati,
mentri un jacobbu a lu scuru facìa chiù
e 'na pigula chiangiva a lu so latu,
di ddi sfrazzi di ddu anticu cetu
chi havìa 'n culu e 'n testa tantu fetu.
Ma dicchiù penza a sti cchiù minghia d'ora,
chi cunsintìru d'addumarici la cannila.
Lu casteddu penza e s'impurrisci ancora,
pirchì nun havi mancu causi di tila,
pirchì nuddu lu talià quann'era bonu
e certi genti 'ntra un lampu e un tronu,
quannu poi pri so sfurtuna cadì malatu,
ucchiati li petri e lu marmu prigiatu,
vidennu ca 'na cazzola nun ci iava mai,
spissu l'alliggiriru di ddi pesanti guai.
Tuttu fu fattu, amici, si fa pri diri,
pri nun ci dari a lu casteddu lu duluri
d'assistiri a picca a picca a lu so dannu,
chi putìa fari lu malutempu in avveniri.
Tanti lu visitaru e cci ieru sicuri,
chistu è lu fattu e tutti lu sannu
ca a spugghiari ddu malatu granni
fu lu forti amuri di tant'anni.
Tanti lu visitaru ddu granni malatu
e, chiangennu e currennu senza ciatu,
cu duluri si purtaru li rigala
cu li carcagna 'n culu scala scala.
Oggi lu casteddu è riduttu mali,
nun havi cchìù ossa e mancu peddi;
ma li ministri, chi 'n testa hannu sali,
lu ciriveddu cravaccaru a tri seddi
e, consultati l'architetti e l'ingignera,
vidennu ca quarchi schinga l'havi ancora,
ca rusicannu si po' sempri spurpari,
tri cazzulati cci li ficiru jittari
e poi, pirchì la petra havi a fruttari,
ci addumaru 'na luci accussì forti,
tantu ca ddi quattru petri cu ddi fari
s'affruntaru di prisintari la so sorti.
Infatti, scurciati e nudi comu sunnu,
forma di casteddu cchiù nun hannu:
unni c'eranu triccentusissantacincu vani,
ora cci sunnu sulu li strunza di li cani.
Lu casteddu chiamatu, ma è un casalinu,
sensali a forza d'un patruni mmistinu,
si putissi parrari, gridassi accussì:
"Jittatimi a lu scuru,è cosa megghia,
cu sta luci m'aviti fattu vrigugnari,
lu me tempu bellu oramai finì,
lassatimi stari cca 'mmenzu sta negghia,
sugnu un scheletru e nenti pozzu dari.
Si vuliti cu mia fari tanti dinari,
di jornu, si v'arrinesci, li putiti fari,
ma di notti a lu scuru vogghiu stari
cu l’occhi chiusi pri nun taliari;
vui nun spinniti accussì sordi di currenti
e iu cercu di dormiri, senza pinzari a nenti.
'Ntra tant'anni guai 'nn haju vistu assai,
nuddu m'havi taliatu e, purritu oramai,
stinnicchiatu 'nn sta rocca vogghiu stari
tanticchiedda sirenu, mi vogghiu arripusari.
Addumati li cannili a quarchi santu
pri aiutarivi a nun ingannari tantu
sti paisani nostri tantu onesti:
giuvineddi afflitti, omini da beni
e matruzzi anziani, chi sannu sulu peni,
chi nun canuscinu ferii nni festi,
chi emigranu la duminica e lu luni
pri circarisi a fatica lu so pani,
ma tanti voti restanu a dijuni
fora di casa e raminghi comu cani,
facennu sempri lu modu e la manera
di stari luntanu assai di la galera.
Lu cori mi si strazza e nenti pozzu,
pirchì sulu quattru petri mi ristaru,
oramai sugnu mortu nni stu cozzu,
nun mi 'nteressanu li stiddi nni lu faru.
Ma si vui, amministratura di stu cazzu,
mentri tanti figghiareddi si nni vannu,
vi faciti la varva e poi lu pizzu
e v'arricchiti cu so gravi dannu,
iu vi dicu di cca 'ncapu sulu
addumativi la cannila 'nta lu culu".
L'auturi di sti siciliani versi
cu la spranza ca nun vannu persi,
chiddu chi dissi nun lu dissi pri d'iddu,
ma pri lu prossimu, pri chiddu, pri chiddu
e poi pri farsi pirdunari quarchi sbagghiu
chi havi sicuramenti stu travagghiu,
a li prisenti, chi capiscinu sti cosi
li ringrazia a tutti e ci offri tanti rosi.

8’337 visitatori in 24 ore 975 visitatori online adesso

L'edera

LU VULIRI DI LU CASTEDDU DI PETRAPIRZIA (Palori a lu ventu)