Cu grandi zelu
ru so terrenu
sempri si curau
e da gramigna
ch’impestava
u campu ru vicinu
allegramenti
sempri si ndi mpipau
Non dessi mai ‘na manu
pi ‘ncuntrastari a pesti
chi schiantava
e intantu u pover’omu
ruvinava.
A gramigna
nu jornu visita fici
puru ‘o so terrenu
ma tutti furu surdi
e i so preghieri
non eppiru forza
pi ‘nchianari o Cielu.
Sulu si ritruvau
e malirittu
ch’idd’omu senza cori!
Ru ‘so egoismu
si ‘ndi parra ancora
sittati ‘o bar
o supra ‘na panchina
ru giardinu
da Villa comunali.
Poviru dd’omu
chi ‘nda vita sua
sulu ru so orticeddu
si curau!